Түркмөнстандын борбору Ашхабадда Көз карандысыз Мамлекеттер Шериктештигине (КМШ) мүчө мамлекеттердин үрөнчүлүк боюнча өкмөттөр аралык координациялык кеңешинин кезектеги жыйыны өттү. Бул салттуу иш-чара КМШ өлкөлөрүнүн алдыңкы айыл чарба адистерин чогултуп, агроөнөр жай комплексин өнүктүрүүнүн актуалдуу маселелерин талкуулады.
Ага Кыргызстандын атынан Суу ресурстары, айыл чарба жана кайра иштетүү өнөр жайы министрлигинин Айыл чарба өсүмдүктөрүн жана багбанчылыкты экспертизалоо боюнча департаментинин директору Б.Мамбетов катышты.
Жыйында негизги маселе дан эгиндерин жыйноо, сактоо жана кайра иштетүү ыкмалары болду. Көптөгөн тармактар үчүн маанилүү азык-түлүк продуктусу жана чийки заты болгон дан аны кайра иштетүү процесстерин оптималдаштыруу, сапатын жогорулатуу жана дүйнөлүк рынокто атаандаштыкка жөндөмдүүлүктү күчөтүү контекстинде талкуунун предмети болуп калды. КМШ өлкөлөрүнүн экономикасында айыл чарбасы негизги ролду ойноорун эске алып, бул маселелер өзгөчө мааниге ээ болду.
КМШнын үрөн маселелери боюнча өкмөттөр аралык координациялык кеңешинин кезектеги жыйындары Шериктештик өлкөлөрүнүн агроөнөр жай тармагында кызматташууну чыңдоого өбөлгө түзөт. Тажрыйба алмашуу, биргелешкен долбоорлорду ишке ашыруу жана күч-аракеттерди координациялоо аймактын айыл чарба өндүрүшүнүн натыйжалуулугун, калкты сапаттуу тамак-аш азыктары менен камсыз кылууну бир топ жогорулатат.
Жыйындын жыйынтыгында үрөнчүлүк чөйрөсүндө кызматташтыкты мындан ары өнүктүрүүгө жана КМШ өлкөлөрүнүн азык-түлүк коопсуздугун чыңдоого багытталган сунуштар кабыл алынды. Мындан тышкары күрүчтүн жана башка айыл чарба өсүмдүктөрүнүн жаңы сортторун сыноо боюнча келишимдер түзүлдү.
