2021-жылдын 17-августунда, Ж. Баласагын атындагы Кырыз улуттук университетинин ботаникалык бакчасынын базасында түзүлгөн Кыргыз Республикасындагы Корей эл аралык айыл чарба программасынын (KOPIA) ачылыш аземи болуп өттү.
Иш-чарага Корея Республикасынын Кыргызстандагы атайын жана ыйгарым укуктуу элчиси Ли Вонджэ, KOPIA агенттигинин Айыл чарбасын өнүктүрүү башкармалыгынын (RDA) вице-администратору Ким Духо жетектеген Кореялык делегация жана Кыргыз улуттук университетинин ректору Канат Садыков катышып, ачылыш аземин Кыргыз Республикасынын Айыл, суу чарба жана регионалдык өнүктүрүү министри Аскарбек Джаныбеков ачып, куттуктоо сөзүн сүйлөдү.
KOPIA агенттигинин негизги максаты – айыл чарбасын өнүктүрүү боюнча практиктерди даярдоо, жаңы технологияларды киргизүү менен чакан дыйкан чарбаларынын өндүрүмдүүлүгүн жогорулатуу, илимий изилдөө жүргүзүү, учурдагы жана келечектеги кадрларды даярдоо, ошондой эле чет өлкөлүк өнөктөштөр менен тажрыйба алмашуу.
